Categories

اعلان

Loading…

په پنجوايي ولسوالۍ کي دوه ښوونځي بيا پرانيستل سول

خبرپاڼه

نېټه : ١٣٩٣-١-٥

کندهار، افغانستان- نن د پوهني رياست له لوري د کندهار په پنجوايي ولسوالۍ کي دوه ښوونځي د زده کوونکو پر مخ پرانيستل سول.

د دغو ښوونځيو د پرانيستني په مراسمو کي د پوهني رياست تدريسي مرستيال محمد عوض نظري، د پنجوايي ولسوال او يو شمېر قومي مشرانو ګډون کړى و.

لومړى د محمد داؤد شاه ابتدائيه ښوونځى د پنجوايي ولسوالۍ په صالحانو کلي کي پرانيستل سو. په دغه ښوونځي کي ١٨٠ زده کوونکو په زده کړه پيل وکړ.

دوهم د تلوکان ابتدائيه ښوونځى په تلوکان سيمه کي پرانيستل سو، چي ٣٨٠ زده کوونکو پکي زده کړه پيل کړه. ياد دوه ښوونځي له کلونو راهيسې د زده کوونکو پر مخ تړل شوي ول، خو اوس د سيمي د قومي مشرانو او د معارف رياست په هلو ځلو يو ځل بيا پرانيستل سول.

د پوهني رياست تدريسي مرستيال محمد عوض نظري د يادو مراسمو پر مهال وويل، په دې وروستيو کي دوى د قومي مشرانو، سپين ږيرو او ولسوالۍ په همکارۍ توانېدلي، چي تړل سوي ښوونځي پرانيزي.

نوموړي وويل: “د قومي مشرانو او ولسوالۍ له مسوولينو څخه مننه کوو، چي تل له پوهني رياست سره همکار پاته سوي دي. د ښوونځيو پرانيستل د دوى د همکارۍ ثمره ده.”

هغه زياته کړه، په پنجوايي ولسوالي کي به پاته ٢٥ ښوونځي هم د دوى په همکارۍ ډېر ژر پرانيزي.

د پنجوايي ولسوال فضل محمد اسحاقزي د پوهني رياست له مسوولينو مننه وکړه، چي د دوى ولسوالۍ ته يې پاملرنه زياته کړې ده. هغه وويل: “موږ به تر وسه له معارف رياست همکاري کوو، تر څو د دغه ولسوالۍ پاته تړل سوي ښوونځي د زده کوونکو پر مخ پرانيزو.”

دا مهال په پنجوايي ولسوالۍ کي ٤٥ ښوونځي شتون لري چي له جملې څخه يې ٢٠ پرانيستي او ٢٥ د بېلابېلو لاملونو له مخي تړلي دي.

د يادوني وړ ده چي په پنجوايي ولسوالۍ کي ٥٣٠٠ تنه زده کوونکي په زده کړه بوخت دي، چي له جملې څخه يې ٢٢٠ تنې انجوني دي.

47 total views, 1 views today

Leave a Reply

Your email address will not be published. Required fields are marked *