Categories

اعلان

Loading…

د ملک کرکټ اکاډیمۍ لوبډله جلال اباد ته راغله

د خیبر پښتونخوا ملک کرکټ اکاډمۍ لوبډله د افغانستان کرکټ بورډ په بلنه ننګرهار ته راورسیده

د افغانستان کرکټ بورډ په بلنه د خیبر پښتونخوا ایالت ملک کرکټ اکاډمۍ لوبډله د ننګرهار ولایت ته راورسیده. دغه لوبډله به د افغانستان کرکټ له ملي نولس کلنې لوبډلې سره د غازي امان الله په نړیوال لوبغالي کې ۵ پنځوس اوریزې سیالۍ ترسره کړي او له دغو سیالیو څخه موخه د آسیایي کپ لپاره د ملي نولس کلنې لوبډلې چمتووالی دی.

د افغانستان ملي نولس کلنې او د خیبر پښتونخوا ایالت ملک فرمان لوبډلو ترمنځ به لومړي سیالي د روان زیږدیز کال دسمبر په اوومه نیټه ترسره شي چې دوهمه سیالي به یې د دسمبر په ۹، دریمه سیالي په ۱۰، څلورمه سیالي په ۱۲ او پنځمه سیالي په ۱۴ نیټه ترسره کیږي.

دا دوهم وار دی چې یوه بهرنۍ لوبډله افغانستان ته د سیالیو لپاره رادرومي او ډیر ژر به د تاجکستان ملي لوبډله هم د افغانستان په غازي امان الله خان کرکټ لوبغالي کې د افغانستان له الف لوبډلې سره سیالۍ ترسره کړي.

د افغانستان کرکټ بورډ اجراییوي رئیس ډاکټر نورمحمد مراد د بهرنیو لوبډلو راتلل د افغانستان کرکټ پرمختګ لامل ګڼي. نوموړي زیاتوي چې ډیر ژر به نورې بهرنۍ لوبډلې هم افغانستان ته د سیالیو کولو لپاره را دعوت کړي.

هیره دې نه وي چې دغو سیالیو ته راتګ وړیا دی او د ننګرهار ولایت ټول اوسیدونکي کولای شي دغه سیالۍ له نږدې څخه د غازي امان الله خان په نړیوال لوبغالي کې وګوري او خپل لوبغاړي وهڅوي.

8 total views, 2 views today

Leave a Reply

Your email address will not be published. Required fields are marked *