Categories

اعلان

Loading…

د امریکايي پوځیانو د وتلو په صورت کې کوم خطرونه جدي دي؟

تاند- شنونکي له طالبانو سره د امریکا د تړون له لاسلیکه وروسته پر خپلو ژمنو د طالبانو د درېدو او د افغانستان د حکومت او طالبانو ترمنځ د سولې په صورت کې په ټولنه کې د طالب جنګیالیو ادغام ستونزمنې او پېچلې مسلې ګڼي.
کتونکي وايي، امریکا له طالبانو سره د سولې موافقې ته خوشبینه ده، خو لا هم له امنیتي ستونزو او په افغانستان کې د وسله والو له خطر سره مخامخ ده.له اتلس کلنې جګړې وروسته له دې هیواده د ځواکونو له ایستلو رانیولې د وسله والو کسانو تر بې وسلې کېدو پورې د سولې لار له لوړو ژورو ډکه ښکاري.

د امریکا ولسمشر ډانلډ ټرمپ ژمنه کړې چې په افغانستان کې به امریکا لا هم قوي استخباراتي حضور ولري چې له افغانستانه پر نوره نړۍ د تروریستي برید د هڅې مخه ونیسي.

د متحدو ایالتونو د پوځ لوی درستیز جنرال مارک میلي د چهارشنبې په ورځ د کانګریس د غړیو د پوښتنو په ځواب کې له دې سره سره چې خطرونه یې تایید کړل، د سولې د موافقې ملاتړ وکړ.

ده وویل«زه له طالبانو سره د تړون د لاسلیک ملاتړ کوم. دې ته په پام چې طالبان ښه پېژنم؛ له دوی سره به خپل استخباراتي معلومات شریک نه کړم.»

له طالبانو سره د سولې په تړون کې، چې ټاکل شوې ده د راروانې شنبې په ورځ په دوحه کې لاسلیک شي، امریکا د دوبي تر پایه له افغانستانه د خپلو شاوخوا ۱۲ زره پوځیانو د یوې برخې د ایستلو ژمنه کړې ده.

په پیل کې به شاوخوا ۸۶۰۰ امریکايي پوځیان په افغانستان کې پاتې شي او د نورو وتل به له دې سره تړلي وي چې د افغانانو ترمنځ سیاسي خبرې نتیجه ورکړي.

د فرانس پریس خبري اژانس د راپور له مخې، د پوځي چارو متخصصان وايي چې له افغانستانه د امریکايي پوځیانو وتل به هغسې وي لکه څرنګه چې تېر کال له سوریې ووتل.

خو له افغانستانه د امریکايي پوځیانو پر وتلو به زیات وخت ووځي او پوځي سرچینې وايي چې د پاتې ځواکونو د ساتنې لپاره به د پوځیانو د ایستلو بهیر تدریجي او په احتیاط وي.

یوې پوځي سرچینې، د نوم د نه ښودلو په شرط فرانس پریس خبري اژانس ته وویل، د دې کار هدف دا دی چې په افغانستان کې پر پاتې امریکايي پوځیانو د طالبانو، القاعده او نورو ډلو له لوري بریدونه ونه شي.

د امریکا د لوی درستیز پخوانی سلاکار کارټر مالکاسین وايي، که امریکايي پوځیانو مخکې تر دې ووځي چې د افغانستان د حکومت او طالبانو ترمنځ د سولې موافقه وشي، وضعیت کېدای شي ډېر خراب شي.

مالکاسین د بهرنیو اړیکو په شورا کې یوې غونډې ته وویل، که د حکومت او طالبانو له موافقې مخکې امریکايي پوځیان ووځي طالبان به داسې وانګېري چې انډول د دوی په ګټه بدل شوی او پر موافقې به سترګې پټې کړي.

و د پالیسۍ لپاره د دفاع پخوانی مرستیال وزیر مایکل فلورنای وايي، د دې لپاره چې له طالبانو سره تړون د امنیتي ضمانتونو پر اساس کېږي، دوی مجبوره دي چې خپل وسله وال کنټرول کړي.

له سولې وروسته بله ستونزمنه مسله به په ټولنه کې د وسله والو کسانو د ادغام څرنګوالی وي ځکه چې اکثره کسان، چې وسله یې په لاس کې ده، په جګړه کې لوی شوي او له جګړې پرته له عادي ژوند سره بلد نه دي.

د بوش او اوباما د حکومتونو په مهال د افغانستان د چارو سلاکار جېمز دوبینز فرانس پریس ته ویلي، په افغانستان کې د دایمي سولې لپاره لازمه ده چې طالبان په افغان امنیتي ځواکونو کې جذب شي او دا اسانه کار نه دی.

د افغانستان د بیارغونې لپاره د امریکا ځانګړي سرمفتش جان سوپکو په خپل وروستي راپور کې ټینګار کړی د وسله والو ادغام هومره سخت او پېچلی دی لکه څومره چې د افغانستان جګړه اوږده او پېچلې ده.

سوپکو د شاوخوا ۶۰ زره طالبانو د ادغام لپاره د امریکا مالي مرستې او د بیارغونې پراخ پروګرام ضروري بللی دی.

onesignal_meta_box_present:
onesignal_send_notification:
response_body:
{"id":"104b480f-8124-483d-b72f-7f6208149517","recipients":861,"external_id":"476d48ed-29d3-8a51-59b3-13be8ce2a056","warnings":["You must configure iOS notifications in your OneSignal settings if you wish to send messages to iOS users.","You must configure Android notifications in your OneSignal settings if you wish to send messages to Android users."]}
status:
200
recipients:
861

Leave a Reply

Your email address will not be published. Required fields are marked *

۸