Categories

اعلان

Loading…

د هوا ککړتیا دکمولو لپاره د لمریزې انرژۍ د سیستمونو پر ملاتړ بحث وشو

د افغانستان د اسلامي جمهوریت جمهوررئیس محمداشرف غني نن ماښام د تجدید وړ انرژۍ تولیدي او صنعتي خدماتو اتحادیې مسوولینو سره په ناسته کې د هوا ککړتیا دکمولو په خاطر د لمریزې انرژۍ سیستمونو څخه د ملاتړ په اړه بحث او خبرې وکړې.

په دې غونډه کې د دولت جوړونکي ټاکنیز ټیم لومړي مرستیال او د افغانستان د زرغون بهیر رئیس امرالله صالح هم حضور درلود، په پیل کې جمهوررئیس غني د یادې اتحادیې د فعالیتونو د مننې پر مهال وویل، حکومت په دې خاطر چې د هوا د ککړتیا مخنیوی وکړي د نفتو او ډبرو سکرو د سون لپاره د بدیلې انرژۍ د تولید په لټه کې دی.

هغه زیاته کړه، حکومت د دغې موخې د ترلاسه کولو په خاطر یوه برنامه ترلاس لاندې لري چې له کابله پیلېږي او دولتي ارګانونه به له لمریزې انرژۍ څخه استفاده وکړي، ترڅو د هوا د ککړېدو مخنیوی وشي.

جمهوررئیس وویل، موږ غواړو ستاسې له ظرفیتونو څخه اګاه شو چې آیا د لمریزې انرژۍ سکتور کې دا ظرفیت او وړتیا لرو چې کار پیل کړي او د ټولو سون توکو چې هوا ککړوي، بدیل واوسي.

جمهوررئیس غني څرګنده کړه، دغه برنامه موږ نه یواځې د دولتي تاسیساتو لپاره، بلکې په راتلونکي کې د ښارګوټو، خصوصي تاسیساتو، حمامونو، هوايي ډګرونو او فابریکو لپاره هم په پام کې لرو چې وتوانېږو د هوا د ککړتیا له پدیدې سره دوامداره او جدي مبارزه وکړو.

جمهوررئیس وویل، د دغې موخې د عملي کولو لپاره حکومت حاضر دی په دې سکتور کې د لمریزې انرژۍ ټولو تولیدي شرکتونو سره مشارکت وکړي چې په دې برخه کې اسانتیاوې برابرې شي.

هغه له یادو شرکتونو څخه وغوښتل چې د باکیفیته لمریزې انرژۍ سامان الاتو د واردولو په برخه کې خپلې غوښتنې او ننګونې بیان کړي.

همدارنګه د دولت جوړونکي ټاکنیز ټیم لومړي مرستیال امرالله صالح هم په خپلو خبرو کې وویل، د شرکتونو د ودې موضوع، په لمریزې انرژۍ د دولتي ودانیو د تسخین (ګرمولو) سیستم او له کابله د هغې د تطبیق پیل کولای شي د هوا د ښه والي په برخه کې مثبتې اغېزې ولري.

هغه زیاته کړه، تاسې د خپل تولید او خپلو فعالیتونو د ظرفیت پراخوالې په واضح ډول وړاندې کړئ چې حکومت ستاسې د فعالیتونو د پراختیا په برخه کې له تاسې سره همکاري وکړي.

ورپسې د تجدید وړ انرژۍ تولیدي او صنعتي خدماتو اتحادیې مسوولینو وویل، اوس د دغه ډول خدمتونو تقاضا کمه ده، ځکه چې یوه نوې پدیده ده، نو له همدې امله د دغې ټکنالوژۍ په وده کې پرمختګ نه لرو.

دوی وویل، بې کیفیته مواد او توکي افغانستان ته واردېږي او له حکومت څخه زموږ غوښتنه دا ده چې د تجدید وړ انرژۍ په برخه کې د ظرفیتونو لوړولو په موخه د تعرفو په راکمولو او پور ورکولو کې همکاري وکړي.

جمهوررئیس غني د دوی په ځواب کې وویل، موږ به هڅه وکړو چې په یوه مشارکت کې له تاسې سره کار وکړو، دولت به د ملي پالیسۍ په چوکاټ کې ستاسې د ودې زمنیه برابره کړي، خو تاسې باید د خپلو شرکتونو پر معیارونو او کیفیت کار وکړئ، واردات مو باید باکیفیته او د نړیوالو معیارونو مطابق اوسي. هغه زیاته کړه، پر ټکنالوژۍ او بشري ظرفیت هم پانګونه وکړئ.

336 total views, no views today

onesignal_meta_box_present:
onesignal_send_notification:
response_body:
{"id":"e8bbf8a8-cf75-4c14-898e-ca5141b14230","recipients":923,"external_id":"b3339423-0e7b-2815-1af4-84e0915f4975","warnings":["You must configure iOS notifications in your OneSignal settings if you wish to send messages to iOS users.","You must configure Android notifications in your OneSignal settings if you wish to send messages to Android users."]}
status:
200
recipients:
923

Leave a Reply

Your email address will not be published. Required fields are marked *

۸