Categories

اعلان

Loading…

د ماین چاودنې په فراه کې ۵ ماشوم زده کوونکو ته مرګ ژوبله واړوله

تاند- په فراه کې دوه زده کوونکي د بم د چاودنې په نتیجه کې ووژل شول او درې نور ژوبل شول.

د فراه د والي ویندوی عبدالرحمن ژوندي خبریالانو ته وویل: نن ماښپښین د پشترود ولسوالۍ د ښوونځي مخته د ماین چاودنه وشوه چې په اثر یې دوه ماشومان ځای پرځای ووژل شول او درې نور ژوبل دي.

چاودنه داسي مهال وشوه چې د ښوونځي زده کوونکي تازه رخصت شوي ول او خپلو کورونو ته روان ول.

ژوندي د دې حملې مسوولیت د وسله والو طالبانو په غاړه واچاوه خو طالبانو تردې دمه څه نه دي ویلي.

تر دې دوه ورځې مخکې په افغانستان کې د ملګروملتو د دفتر د بشري څانګې مسوول اعلان وکړ چې وسله والو طالبانو د افغانستان د لوېدیځ په څلورو ولایتونو کې بمي حملو ته زور ورکړی او په دې سیمه کې د ملکیانو اکثره تلفات د طالبانو له لوري پر سړکونو د چاودېدونکو موادو او ماینونو له کبله رامنځته کېږي.

په افغانستان کې د م.م. د بشري حقونو د برخې مسوول جارجیت ګنګن په یوه خبري غونډه کې د ملکي افغانانو د مرګ ژوبلو پر زیاتېدو داندېښنې د څرګندولو تر څنګ وویل: د افغانستان د جنوب لوېدیځ د څلورو ولایتونو د حالاتو له څېړنې ورته جوته شوې چې په دغو ولایتونو کې د ملکیانو مرګ ژوبلې په بې ساري ډول زیاتې شوي دي.

ده زیاته کړه:«د تېر کال د ورته مودې په پرتله د سږکال په لومړیو لسو میاشتو کې د افغانستان په ۴ لوېدیځو ولایتونو کې د ملکیانو تلفات ۶۰ فیصده زیات شوي دي.»

تقریباً هره دوهمه ورځ د ملکیانو موټر د طالبانو له لوري په سړکونو کې پر اېښودل شویو ماینونو یا چاودېدونکو موادو خیژي او مرګ ژوبلې اړوي.

د ملګروملتو د بشري حقونو مسوول هم وویل چې په سلو کې ۸۵ ملکیان د سړک د غاړې په بمونو او ماینونو وژل کېږي.

د ده په وینا په تېرو لسو میاشتو کې په فراه، هرات، غور او بادغیس ولایتونو کې ۷۳۸ تنه وژل شوي چې ۲۳۰یې د سړک د غاړې په بمي بریدونه کې وژل شوي دي.

د ملګروملتو د بشري حقونو د څانګې مشر په سلو کې د درو ملکیانو د وژلو مسوولیت افغان امنیتي ځواکونو ته متوجه وباله.

ملګروملتو له ښکېلو خواوو وغوښتل چې له داسي وسلو او چاودېدونکو موادو کار وانخلي چې بېګناه خلک پرې وژل کېږي.

6 total views, 1 views today

Leave a Reply

Your email address will not be published. Required fields are marked *