Categories

اعلان

Loading…

د خپلواکۍ د ۱۰۰ کالیزې په ویاړ د ۲ کتابونو مخکتنه

په کندز کې د خپلواکۍ سلمې کليزې په وياړ د پردېس کلتوري او ادبي ټولنې په نوښت د دوو کتابونو د مخکتنې غونډه

راپور: محمد عزیز پردېس

پرون چهارشنبه ماسپښين د روان کال د زمري ۱۶مه د شمال ختيځ زون د وتلي شاعر او ليکوال عرفات پردېس د دوو تازه چاپ شويو (له حرمه تر حرمه) او (سردار داوود او ملاقُلي ) ټولګو د مخکتنې غونډه د کندز ولايت پوهنې رياست د غونډو په تالار کې د لسهاوو کسانو په ګډون ترسره شوه.
ياده غونډه کې د کندز ولايت د مختلفو ادارو روئساو، استازو، شاعرانو، ليکوالانو، د پوهنتونونو استادانو، د ادب او فرهنګ مينه والو، د مختلفو بنسټونو استازو او ځوانانو ګډون درلود.

غونډه د الله تعالی د سپېڅلي کلام د څو آيتونو د تلاوتولو او د هېودا ملي غرور (ملي سرود) په غږولو سره د استاد سيدالرحمن سالار او صدام اتل په وياندويۍ پيل شوه.

د غونډې د پيل وينا لپاره د پردېس ټولنې رئيس محمد اسلم رشيدي دريځ ته راوغوښتل شو، رشيدي ګډونوالو ته د ښه راغلاست ترڅنګ د پردېس ټولنې په فعاليتونو رڼايي واچوله او له ټولو هغو ادارو، بنسټونو او فرهنګپالو څخه يې مننه وکړه، چې د دې غونډې په برابرولو کې يې هراړخيزې همکارۍ کړې وې.


ياده غونډه په دوو برخو وېشل شوې وه. لومړۍ برخه د يادو کتابونو پر سر د کندز پوهنتون او سلام پوهنتون او يو شمېر نورو استادانو لخوا ځانګړو ليکل شويو څېړنيزو مقالو ته ځانګړې شوې وه چې يادو کسانو په ترتيب سره د کتابونو په هکله خپلې هر اخيزې مقالې ګډونوالو ته وړاندې کړې: د کندز پوهنتون د پښتو څانګې آمر او استاد، پوهنمل عبدالمجيد پردېس، د کندز پوهنتون ځوان استاد، پوهنيار زاهدالله کريمزی، د سلام پوهنتون د شرعياتو پوهنځي استاد او د کندز ولايت مقام د ظرفيت لوړونې آمر ښاغلي عبدالبصير وهاج.

دويمه برخه د مختلفو دولتي او غير دولتي ادارو او بنسټونو ويناوالو ته ځانګړې شوې وه، چې لاندې کسانو په ترتيب سره خپلې ويناوې ګډونوالو ته واورولې:

د کندز ولايت مقام وياند، ښاغلي عصمت الله مرادي، د کندز د اطلاعاتو او کلتور رئيس ښاغلي فدا محمد ارزښت، د کندز د پوهنې رئيس ښاغلي نجيب الله ثاقب، د ضايي فرهنګي خونې رئيس ښاغلي حاجي ضياالحق ضيايي، په کندز کې د ځوان غبرګون رئيس ښاغلي نعمت الله تيموري، د پسرلي کلتوري او ادبي ټولې غړي او د کندز مخور سپین ږيري ښاغلي غلام حیدر حيدر او همدارنګه د شاعرانو په استازيتوب استاد سيد نعيم عسکر او ښاغلي استاد حبيب الله فياض خپل په ښکلو شعرونو غونډې ته لا ښکلا ورکړه.

د غونډې په پای کې پردېس ټولنې رئيس لخوا ياد کتابونه د غوندې ځينو ګډونوالو ته ډالۍ شول او غونډه د پردېس ټولنې پخواني رئيس او د احمد شاه بابا انستيتيوت مسوول ښاغلي انجينير جان محمد بلوچ په وروستۍ وينا او دعايې سره پای ته ورسېده.

657 total views, no views today

Leave a Reply

Your email address will not be published. Required fields are marked *

۸