Categories

اعلان

Loading…

نظم | محمدنعمان دوست

د طالب جنازه مه باسئ له کوره

ګوره مور به یې لمبه کاندئ بې اوره

دا به هم د چا امید د چا ارمان وي

څو بېمار زړونه به ده باندې ودان وي

***

دغه دنګ سرباز را پریږدئ چې ژوندی وي

پرې ډاډه مې د وطن د مور زړګی وي

دا چنار چنار قدونه د کتو دي

ته او خدای، دغه ځوانۍ نو د ویشتو دي؟

***

چې ولاړ په سره ګرمۍ کې هغه ځوان دی

دا پولیس دی، د دې خلکو نګهبان دی

دا مړ نکړئ، ښار به ګوره بیابان شي

د لیوانو په پنجو کې به ښاریان شي

***

های!

د خپل کلي هدیرو ته مو لږ خیال دی؟

ته وا ځمکې را شین کړی پر او بال دی

تر هر کوره رسیدلي دي قبرونه

پکې ښخ دي د همدې کلي ګلونه

***

وئ،

خدایه، دا خو په لکړو راروان دي

وئ،

دا خو ټول زموږ د کلي ماشومان دي

آن ورانه کې یې پښې دې چا پرې کړي

دا پرې کوم قاتل خوني سترګې، سرې کړي؟

***

تور لوګي سره، سرونه په هوا شول

ماین پټاو شو، اندامونه په هوا شول

میندې راغلې په لاسونو کې یې سرونه

ښکلوي، د بې تنو بچو مخونه

***

جسدونه په سیندونو کې روان دي

تښتیدلي له هیبت ځنې کبان دي

هره ورځ په لاش خورو باندې اختر وي

په منګولو کې یې نیولی زموږ سر وي

***

سرې لمبې مو له ښوونځیو پورته کیږي

منارونه، محرابونه را نړیږي

په جومات کې سیپارو اخیستی اور دی

د کوترو لښکر ګوره سوی سکور دی

***

الوتکې خالي کړی خپل ټټر دی

هاغه شین کلي کې ګوره جوړ محشر دی

یوې مور غوښه راټوله کړه پلو کې

په تخرګ کې یې نیولی د زوی سر دی

***

نو موږ ولې همیشه خپلو کې جنګ کړو؟

نو موږ ولې یو او بل په وینو رنګ کړو؟

نو موږ ولې د پردي ډول ته نڅیږو؟

او د جنګ په بازارونو کې خرڅیږو

***

لا تر څو به پرې کوو د یو بل غاړې

ځناور به را تو کئ د نفرت لاړې

په خدای ګورئ، ټول جهان کې شرمنده یوو

له کاروان د انسانیته پس مانده یوو

***

دا [دیوان] زموږ په وینو دلته پايي

که موږ یو شوو دوی به تښتي نعمان وايي

راځئ، یو د بل مخونه سره ښکل کړو

د دښمن په زړه کې سره اورونه بل کړو

نعمان دوست، د جمعې شپه ، ۱۳۹۸ ،د غبرګولي ۹مه

1,013 total views, 2 views today

onesignal_meta_box_present:
1
onesignal_send_notification:
status:
200
recipients:
626

1 comment

  1. m a kargar Reply

    ډېر ښکلي شعر دى ۔ هم دې کيسې ښکلي دي اوهم دې شعر داسې مالوميږي چې زړه او ذهن دې هم

Leave a Reply

Your email address will not be published. Required fields are marked *

۸