Categories

اعلان

Loading…

ولسي جرګه وايي، ګاونډي هیوادونه دې له طالبانو سره له خبرو راوګرځول شي

تاند- د افغانستان د ولسي جرګې غړیو له بهرنیو چارو وزارت څخه وغوښتل چې له طالبانو سره د سیمې د هیوادونو د چارواکو د کتنو مخه ونیسي.

ولسي جرګې وروسته له دې د افغانستان له بهرنیو چارو وزارت څخه په دې برخه کې د اقدام غوښتنه وکړه چې روسیې او ایران طالب استازو ته د خبرو لپاره بلنې ورکړې.

که څه هم طالبان د ابوظبي، دوحې او جدې غونډو ته هم وبلل شول خو د ولسي جرګې غړي دا غونډې د افغانستان د مسلې د حل، او د مسکو او تهران بلنې طالبانو ته د رسمیت ورکولو او ملاتړ لپاره ګڼي.

د ولسي جرګې غړیو ویلي چې د افغانستان د حکومت له حضوره پرته له طالبانو سره د بهرنیو هیوادونو د چارواکو کتنې د افغانستان سولې ته زیان اړوي.

د ولسي جرګې ځینې غړي باور لري چې له طالبانو سره دا ډول کتنې د افغانستان د جګړې د اوږدېدو سبب کېږي.

د ولسي جرګې رييس عبدالروف ابراهیمي وویل چې د افغانستان د حکومت له ګډونه پرته له طالبانو سره د بهرنیو هیوادونو کتنې د افغانستان په کورنیو چارو کې لاسوهنه ده.

د ولسي جرګې غړي محمد سلجوقي وویل، د سیمې هیوادونه د دې لپاره له طالبانو سره لیدنې کتنې کوي چې طالبانو ته مشروعیت ورکړي.

ده دا هم وویل چې د افغانستان د حکومت د استازو له حضوره پرته به له طالبانو سره کتنې به له دغو هیوادونو سره د افغانستان د دیپلوماتیکو اړیکو د کمزوېدو سبب شي.

د ایران د بهرنیو چارو وزیر محمد جواد ظریف تېره اوونۍ د هند د سفر په لړ کې په یوه مرکه کې وویل چې طالبان باید د افغانستان په راتلونکې کې رول ولري.

ده همداراز وویل چې د ایران د هغو سرحدي سیمو د امنیت لپاره، چې د طالبانو تر کنټرول لاندې دي، له دې ډلې سره استخباراتي ارتباطات لري.

د ښاغلي ظریف دا څرګندونې د ګڼو افغانانو له عکس العمل سره مخامخ شوې.

ځینو افغان چارواکو هم د ایران د بهرنیو چارو وزیر څرګندونې د افغانستان په کورنیو چارو کې لاسوهنه وبللې.

د بهرنیو چارو وزارت سیاسي مرستیال ادریس زمان د ایران د بهرنیو چارو وزیر جواد ظریف څرګندونې د دیپلوماتیکو نورمونو خلاف وبللې.

ښاغلي زمان ویلي«د افغانستان د اسلامي جمهوریت د نظام په جوړښت کې د وسله والو ډلو د شاملولو د تجویز په ګډون د هیواد په نظام کې د بدلون په اړه هر ډول وړاندیز د ټولو دیپلوماتیکو موازینو خلاف او د افغانستان په چارو کې ښکاره لاسوهنه ګڼل کېږي.»

د ولسمشر غني مرستیال ویاند شاه حسین مرتضوي هم د ایران د بهرنیو چارو وزیر پر څرګندونو غبرګون ښکاره کړی او هغه یې د افغانستان په چارو کې د ایران مداخله بللې ده.

1,202 total views, 1 views today

onesignal_meta_box_present:
1
onesignal_send_notification:

Leave a Reply

Your email address will not be published. Required fields are marked *

۸