Categories

اعلان

Loading…

ګټه وټه کتاب چاپ شو

(ګټه وټه) پښتو ته نوی ژباړل شوی کتاب دی چې محتوا یې تر ډېر د پیسو په ګټلو او سپما را څرخي. د ننني انسان تر ټولو ستره لاسته راوړنه پیسې دي چې د خوشبختۍ، انګېزې او ټولې نړۍ د پرمختګ سبب شوې دي. پیسې په خپل ځای کې د ځانګړي ارزښت لرونکې دي. پیسې انسانانو ته قوت او ازادي ورکوي، پیسې انسانانو جوړې کړې چې دوی ته اسانتیاوې رامنځته کړي او تر ټولو مهم شی چې امنیت دی، ور په برخه کړي او د دې ټولو په شتون کې انسانان له خپل ژوند څخه خوند واخلي.
مشهور لیکوال زیګ زیګلار وایي، پيسې هر څه نه دي، خو د پیسو اهمیت د اکسیجن په کچه دی. څومره چې پیسې مثبتې ځانګړنې لري، دغه راز کېدای شي منفې او تخریبي پایلې هم ولري، خو تجربو دا ثابته کړې چې تر منفي هغو یې مثبت اړخونه ډېر دي. وګورئ چې پیسې له چا سره دي او د کومو موخو لپاره کارول کېږي؟ د یوه ډاکتر په لاس کې چاړه یو چاته ژوند وربښي، خو د یوه نادان کس په لاس کې د چاړې شتون د یو چا ژوند اخیستلی شي. دې ته په کتو باید چاړه د داسې کس په لاس کې وي چې خلکو ته ژوند ور وبښي. د هغو کسانو شمېر چې د چاړې په وسیله خلکو ته ژوند ورکوي، په ځلونو د هغه کسانو تر شمېر ډېر دی چې د خلکو ژوند پرې اخلي. که پیسې د هوښیارو خلکو په لاس کې وي، کېدای شي یوه نوې دنیا پرې جوړه کړي.
ډېری پوهان له دې جملې سره چې «پیسې نېکمرغي نه راولي» مخالف دي. دوی پر دې باور دي چې پیسې د نېکمرغۍ راوړونکې دي، پیسې کولای شي یو ناروغ د ناروغۍ له بستره خلاص کړي، پیسې کولای شي زده کوونکو او محصلینو ته د زده کړو زمینه برابره کړي، پیسې پوهنتون جوړولی شي، پیسې روغتون جوړولی شي، د پیسو په وسیله کولای شو فابریکې جوړې کړو او زرګونو کسانو ته پکې د کار زمینه برابره کړو. تر ټولو ښه دا چې پیسې له بې وزلو کسانو سره د مرستې سبب هم کېدای شي. پیسې د کورني نظام جوړوونکې دي، پیسې کولای شي د یوې کورنۍ غړي په یوه ټغر سره راټول کړي، بالاخره ویلی شو چې پیسې با ارزښته دي. ګټه وټه کتاب مهدي فیروزي لیکلی چې تازه حمیدالله حمیدي پښتو ژبې ته را ژباړلی دی. په دغه کتاب کې د پیسو پر ارزښت، د پیسو پر ګټلو، د شتمن کېدو پر لارو چارو، سپما او په ټوله کې پر ګټې وټې خبرې شوې دي. کتاب په کابل کې د اکسوس کتابپلورنځي له خوا په وایګل چاپخونه کې په لوړ کیفیت او ښکلي صحافت چاپ شوی دی.

598 total views, 2 views today

onesignal_meta_box_present:
1
onesignal_send_notification:

Leave a Reply

Your email address will not be published. Required fields are marked *

۸