Categories

اعلان

Loading…

په سرپُل کې د یوه زورواک قوماندان د نیولو په عملیاتو کې ۱۴ تنه وژل شوي

تاند- د سیمه ییزو زورواکانو د نیونو په لړ کې ۱۴ تنه په سرپُل ولایت کې د یوه زورواک د نیولو په مهال ووژل شول.

د سرپُل د والي ویندوی ذبیح الله اماني نن /چهارشنبه/ رسنیو ته وویل، ۶ افغان امنیتي ځواکونه او د زورواک قوماندان مهدي مجاهد ۸ پلویان په هغه نښته کې ووژل شول چې پرون ماښام د بلخاب ولسوالي په دهنه کلي کې ونښته.

اماني وویل چې د مهدي مجاهد د پلویانو او امنیتي ځواکونو ترمنځ نښتې نن هم دوام وکړ او نوموړی تراوسه پورې لا نیول شوی نه دی.

په دې نښته کې د مهدي مجاهد ۱۲ نور پلویان ژوبل شوي دي.

د دواړو خواوو ترمنځ نښته وروسته له دې پیل شوه چې افغان امنیتي ځواکونو د مهدي مجاهد د نیولو هڅه وکړه.

د سرپُل د والي ویندوی وايي چې مجاهد د خلکو په وژلو، د قانون پر سرغړونې او د عام ولس په ځورولو کې لاس لري.

نوموړي په بلخاب ولسوالي کې د ولسي جرګې د کاندیدانو د کمپاین مخه هم نیولې ده.

تر دې وړاندې د روانې اوونۍ د شنبې په ورځ /اکتوبر۶/ افغان امنیتي ځواکونو د غور ولایت په لعل و سرجنګل ولسوالي کې یو سیمه ییز زورواک ونیوه.

په سرجنګل کې قوماندان علي پور، چې په قوماندان شمشېر مشهور و، د امنیتي ځواکونو په وړاندې مقاومت وکړ چې په نتیجه کې یې ۱۱ تنه ووژل شول.

نوموړی، د ډېرو بېګناه خلکو د وینو په تویولو تورن دی، د غور ولایت د لعل و سرجنګل ولسوالي په اسداباد کلي کې ونیول شو.

همداراز د دوشنبې په ورځ په ننګرهار کې د سیمه ییزو پولیسو پخوانی قوماندان بلال پاچا په ۶ کاله بند محکوم شو.

پاچا، چې پخوا په اچین ولسوالي کې د سیمه ییزو پولیسو قوماندان و، په قتلونو، غلاوو او د شخصي بند په لرلو تورن و.

4,485 total views, 2 views today

onesignal_meta_box_present:
1
onesignal_send_notification:

Leave a Reply

Your email address will not be published. Required fields are marked *