Categories

اعلان

Loading…

د پوهاند دوکتور زیار څو شعرونه

پوهاند زيار،اکسفورډ، ۵ تله ۹۷

خوږې پښتيانا ته

[ زېږون: سويس،۱۳۶۶– د تلې (ميزان) پېنځمه ]

د بخت ستوری

موږ د ځمکې له  تيارو تورو تروږميو،

بوږنوړو ماښامونو…

بدرگه موغرونه غرونه فريادونه

په تکل د هسکو هسکو اسمان لارو،

د رڼاوو او برېښناوو تر ټاټوبي…

*****

هرکلي ته مو ولاړ ځلنده ستوري،

لمرسپوږمۍ را گومارلي

-چارناچار په ناسوبتيا کې-

چې د غاو او نياو په ((تله))

کړي د بخت او دنياو ستوري

راروښانه  اوځلانده

دا له ويره داوروينوتاند لبانو

شپه و ورځ  په تورو نمرو کې رانغښتې،

دغه بوره او بدنامه تياره ځمکه !!؟

پوهاند م.ا. زيار

۲۹اگست ۱۸

* تروښنه

داڅه راپېښ شول يو وار:

هغه باغ باغ خنداوې،

ها گلورينې او ښايسته موسکاوې،

چې لرې برې  نڅېدلې

له عمرو راهيسې

د دغه ښار پر سرکوشونډو باندې…

د تورځنگله ،

تورو اوبو،

توندو سيليو وتروښلې چېرې،

د کوم ناچېرې   نشت اباد

تر جلوهلو دښتو،

تر  مرگاني ساراوو ؟

اختطاف*

——————————

د استاد پوهاند زيار  دوه شعره:

راڼه توري

د کاغذ پر سپينه ټنډه،

پر رڼه سپينه هېنداره

د سولگر(* ) مې

يو يو توری د برخليک کښم.

= = =

شپه او ورځ اوبه کوم د سترگو تور

او د تورې سياهي په څېر

پرې کاږم

ښکلي ښکلي تک تور توري.

= = =

وي ترڅو د سترگو تور مې

سياهي به رغوم ترې

او پرې کښم به يو يو توری

په دې هوډ او په دې موخه

چې کړم روڼ  پرې

دغه تورتياره برخليک خپل!!؟

* سولگر= کمپيوټر  

تلپاتې خوبولي

له هر رپ سره د سترگو

زمانه پر تاندېدو ده

او نړۍ پر ځوانېدو،

هلهله د نويوالي،

هنگامه د پرمخيون.

له هر پړک سره  دستورو،

له هر څرک سره د لمر

نوې نوې نغمې زېږي،

نوې نوې انگازې د ارغنون

راځي له لرې

بوږنوي درانه خوبونه د پېړيو

د تلپاتې خوبولو.

*     * *

آخوا آخوا لورالورې

– له خوښۍ او مستۍ نمانځي

د ماڼيو، اسمانڅکو څښتنان

زېږون جشن د ښادۍ د نوي کال  

په سرو شنو ښکلو اورلوبو…

خو رادېخوا يې ددې خاورين غونډاري

-د برخليک دخوراړيانو-

په تيارو توروکوډلو کې کرلي

– وار له مخه-

غرغنډې د سرو اورونو

او شنه زهر يې را پاشلي

په سپېرو لارو کوڅو کې!

830 total views, 2 views today

onesignal_meta_box_present:
1
onesignal_send_notification:

Leave a Reply

Your email address will not be published. Required fields are marked *