Categories

اعلان

Loading…

د جلال اباد د کونسلګرۍ د بندېدو له کبله د تورخم له لارې پاکستان ته د تلونکو افغانانو شمېر کم شوی

تاند- په لنډيکوتل کې د پاکستان د مرکزي حکومت استازي وايي چې د تورخم له لارې پاکستان ته د ورتلونکو افغانانو شمېر لږترلږه په سلو کې ۲۰ لږ شوی دی.

پاکستاني چارواکي وايي چې د افغانانو د ورتګ شمېر وروسته له دې کم شو چې پاکستان په جلال اباد کې خپله کونسلګري د اګست په یودېرشمه نېټه بنده کړه.

پاکستان ته د افغانانو د تګ کمېدا پاکستان ته د پام وړ اقتصادي تاوان اړوي ځکه چې هر کال په لسګونه زره افغانان یوازې د درملنې لپاره پېښور او نورو ښارونو ته ځي او ډېرې پیسې په درملنه لګوي.

په نړۍ کې د ګرځندویانو په اړه څېړنې ښيي چې تر ټولو ګټور سیلانیان طبي هغه دي چې تر ټولو زیاتې پیسې لګوي.

اوس اکثره افغانان د پاکستان د وېزې د ترلاسه کولو لپاره باید کابل ته لاړ شي او د پاکستان له سفارته وېزه واخلي.

پاکستان ته سفر کوونکي افغانان وايي چې اوس باید د پاکستان د وېزې لپاره اوږد انتظار وباسي.

پاکستان د تېرې میاشتې په پای کې وویل چې د ننګرهار والي د دوی د کونسلګرۍ په چارو کې لاسوهنه کوي ځکه حپله کونسلګري بندوي خو وروسته یې بیا وویل چې د کونسلګرۍ امنیتي تدابیر ښه نه دي او له همدې کبله خپله کونسلګري تر هغو نه پرانیزي چې د افغانستان حکومت یې د امنیت غم ونه خوري.

په تورخم کې د پاکستان سرحدي مامورین وايي، په جلال اباد کې د کونسلګرۍ تر بندېدو مخکې د ورځې شاوخوا ۵ زره افغانان د تورخم له دروازې پاکستان ته ورتلل، خو اوس شاوخوا ۴ زره تنه له دې لارې پاکستان ته اوړي.

دوی وايي چې د کونسلګرۍ بندېدا د دوو هیوادونو ترمنځ پر سوداګرۍ هم منفي اغېز کړی دی.

د افغان لاریو چلوونکي وايي چې د وېزې د ستونزې له کبله ځینو موټرچلوونکو کار پرې ایښی دی او ځینې نور بیا مجبوره دي چې د پاکستان له سفارت څخه په رشوت وېزه واخلي.

د دوی په وینا د دې لپاره چې وېزه په ځنډ ورکول کېږي، هر څوک غواړي چې ژر وېزه واخلي نو مجبوره دی چې پیسې ورکړي.

له بلې خوا پاکستاني سوداګر وايي چې د کونسلګرۍ تر بندېدا وړاندې یې وېزې ته اړتیا نه لرله خو اوس پاکستان مجبوره کړي چې باید لومړی د افغانستان وېزه ولري.

9,689 total views, 1 views today

onesignal_meta_box_present:
1
onesignal_send_notification:

Leave a Reply

Your email address will not be published. Required fields are marked *