Categories

اعلان

Loading…

امریکا له افغانستانه غوښتي چې خپل ځواکونه له لېرې پرتو سیمو وباسي

تاند- نیویارک ټایمز ورځپاڼه وايي، د ولسمشر ټرمپ اداره د افغانستان له حکومته غواړي چې له کم نفوسو سیمو خپل ځواکونه وباسي.

ورځپاڼې د امریکايي چارواکو په قول ویلي چې د دې پلان د عملي کېدو په صورت کې به د افغانستان پراخې ساحې د طالبانو لاس ته ولوېږي.

تر دې پخوا د ۲۰۱۴ کال په پای کې له افغانستانه د امریکايي او ناټو پوځیانو له وتلو وروسته امریکا د افغانستان له امنیتي ځواکونو غوښتي وو چې د تلفاتو د کمېدو لپاره دې له یو شمېر لېرې پرتو سیمو ووځي.

نیویارک ټایمز د امریکايي چارواکو په قول وايي، دا تازه غوښتنه د افغانستان لپاره د ولسمشر ټرمپ د هغې ستراتیژۍ ناڅرګنده شوې برخه ده چې تېر کال یې اعلان کړه.

دغو چارواکو، چې نه یې غوښتل نومونه یې څرګند شي، ویلي چې د دې کار هدف دا دی چې افغان امنیتي ځواکونه په ناخوندي ځایونو کې له حملو وژغورل شي او پر ځای یې تمرکز پر ګڼ مېشتو سیمو وکړي.

په افغانستان کې د غوڅ ملاتړ ماموریت عمومي قوماندان ډګرجنرال جان نیکلسن تېره میاشت په بروکسل کې یوې خبري غونډې ته وویل، د لېرې پرتو سیمو پوستې د طالبانو له لوري نیول کېږي چې په ترڅ کې یې د افغان امنیتي ځواکونو وسایط او وسلې د یاغیانو لاس ته لوېږي.

ده زیاته کړه«پر دې مسله اختلاف دی چې ښه پوځي تاکتیک څه دی او د ټولنې اړتیاوې څه دي.»

نیویارک ټایمز ورځپاڼې ته د امریکا د دفاع وزارت یوه چارواکي وویل، دا ستراتیژي د افغانستان په حکومت پورې تړلې ده چې ایا خپل پوځیان باسي او که نه.

ده همداراز وویل، ځینې افغان قوماندانان د امریکایانو له دې وړاندیز سره موافق نه دي ځکه چې دوی فکر کوي چې ځايي خلک به دا کار له دوی سره د حکومت غداري وګڼي.

د امریکا د سي آی اې له اټکل سره سم د افغانستان د ټول نفوس په څلورو کې یوازې یوه برخه په ښارونو کې اوسي.

د افغانستان د بیا رغونې لپاره د امریکا د سرمفتش د دفتر د معلوماتو پر اساس د افغانستان په ۴۰۷ ولسوالیو کې حکومت پر ۲۲۹ کنټرول لري، ۵۹ ولسوالۍ د طالبانو په لاس کې دي او ۱۱۹ نورې ولسوالۍ لاس په لاس کېږي.

په امریکا کې د افغانستان سفیر حمید الله محب دا خبره نه تاییدوي چې افغان او امریکايي ځواکونه کلیوالي سیمې طالبانو ته پرېږدي.

هغه وايي، هدف دا دی چې د ښاري سیمو امنیت خوندي شي څو امنیتي ځواکونه وروسته پر کلیوالي سیمو تمرکز وکړي.

31 total views, 2 views today

onesignal_meta_box_present:
onesignal_send_notification:

1 comment

  1. حیات الله نیازی Reply

    افغان دولت، ولس او حکومت باید د امریکا دغه خبره ونه منی او د دا ډول سرګندونو باید سپیناوی وغواړی.

Leave a Reply to حیات الله نیازی Cancel reply

Your email address will not be published. Required fields are marked *