Categories

اعلان

Loading…

طالبانو لږترلږه په ۳ ولایتونو کې جګړه بیا پیل کړې ده

تاند- وسله والو طالبانو د خپل اعلان کړي اوربند د پای په وروستیو ساعتونو کې په هلمند، کندهار او لغمان ولایتونو کې پر افغان امنیتي ځواکونو حملې وکړې.

طالبانو د دوشنبې په ورځ وویل چې اوربند به اوږد نه کړي.

ګومان کېده چې طالبان به د دوشنبې تر ورځې پورې حملې ونه کړي خو دې ډلې د اختر د درېمې تر پایه، چې د شپې ۱۲ بجې دي، صبر ونه کړ.

په تېرو درو ورځو کې افغانان سخت خوشاله ول او ډېرو رسنیو ته ویلي چې له څه باندې یوې نیمې لسیزې وروسته د لومړي ځل لپاره د اختر په خوشالۍ پوی شوي دي.

دا په داسې حال کې ده چې داعش ترهګرې ډلې حملو ته دوام ورکړ او په جلال اباد کې یې د شنبې او یکشنبې په تروریستي حملو کې لږترلږه ۵۰ تنه شهیدان او تر ۱۱۵ زیات نور ژوبل کړل.

د طالبانو اوربند د ډېرو خلکو توقع لوړه کړه او اوس چې طالبانو د جګړې د دوام خبره کړې، خلک زیات مایوسه شوي دي.

په کندهار، هلمند او د لغمان په الیشنګ کې امنیتي سرچینې وايي چې طالبانو تېره شپه د دوی پر پوستو بریدونه پیل کړي دي.

طالبانو دا بریدونه له دې سره سره کړي چې ولسمشر غني او د امریکا د بهرنیو چارو وزیر ویلي چې د نړیوالو ځواکونو د وتلو په شمول پر ټولو مسلو له طالبانو سره خبرو ته تیار دي.

تراوسه پورې د طالبانو د تېرې شپې د حملو په نتیجه کې د مرګ ژوبلو په اړه څه نه دي ویل شوي.

د افغانستان ولسمشر اشرف غني پرون اوربند ۱۰ ورځې نور اوږد کړ.

څرګنده نه ده چې هغه طالبان به، چې د اختر په درو ورځو کې د ولس او امنیتي ځواکونو له لوري د اوربند په خاطر ونازول شول، د افغان امنیتي ځواکونو پر ضد په جګړه کې د پخوا په شان برخه واخلي او که دریځ به یې بدل شوی وي.

65 total views, 1 views today

onesignal_meta_box_present:
onesignal_send_notification:

1 comment

  1. ملنګ Reply

    نو چه داسی ده باید طالبانو ته سخت ګذار ورکړل شی لکه څنګه چه د پاکستانی طالبانو مشر ډرون مړ کړ داسی د ملا هیبت الله هم ووژل شی

Leave a Reply

Your email address will not be published. Required fields are marked *