ولسمشر غني له طالبانو سره اوربند ۱۰ ورځې نور اوږد کړ

تاند- د افغانستان ولسمشر محمد اشرف غني نن /یکشنبه/ له طالبانو سره اوربند ۱۰ ورځې نور اوږد کړ.

ښاغلي غني پرون /شنبه/ ویلي و چې اوربند تر نامعلومې مودې پورې اوږدوي خو دقیق وخت به یې وروسته اعلان کړي.

د ولسمشر غني له نوي اعلان سره سم، له طالبانو سره د افغانستان د حکومت یو اړخیز اوربند د جون تر شلمې پورې دوام کوي.

دا په داسې حال کې ده چې د طالبانو یوه ویندوی ذبیح الله مجاهد نن وویل، طالبان نه غواړي چې اوربند اوږد کړي.

نن /یکشنبه/ د اختر درېمه د طالبانو د اوربند وروستۍ ورځ اعلان شوې ده.

ولسمشر غني ویلي چې افغان امنیتي ځواکونه د هرې حملې په وړاندې د ځان دفاع کولی شي خو تهاجمي عملیات به نه کوي.

همداراز به امنیتي ځواکونه د طالبانو د تګ راتګ مزاحمت نه کوي.

طالبانو ویلي چې ۳ ورځني اوربند ثابته کړه چې د طالبانو په منځ کې یووالی ټینګ دی او له پراخ ولسي ملاتړه برخمن دي.

د اوربند په تېرو ورځو کې عامو افغانانو، دولتي ځواکونو او چارواکو د طالبانو تود هرکلی وکړ او اکثرو خلکو ورڅخه وغوښتل چې د جنګ لار پرېږدي او سوله وکړي.

طالبانو ته ډېرو خلکو وویل، بهرني ځواکونه یوازې د سولې په وسیله له افغانستانه ایستل کېدای شي.

د افغانستان ولسمشر هم وویل چې د بهرنیو پوځیانو د شتون او برخلیک په ګډون د طالبانو په ټولو غوښتنو خبرو ته تیار دی.

امریکا هم ویلي چې حاضره ده د افغانستان او طالبانو د سولې په خبرو کې ګډون وکړي.

55 total views, 10 views today