Categories

اعلان

Loading…

پاخه غنم | لیکوال: عصمت الله صالح‎

د تندي په ژورو ګونځو کې یې غوټه- غوټه خولې ولاړې وې، ملا یې سیخه کړه، له غټې اوسپنیزې کاسې یې خوشتې جامې پورته کړې، ټیکری یې پر پیڅکه شو، پر کیڼ غوږ یې څو تاره سپین وېښتان پرېوتل. پاڅېده، لمدې جامې یې ونيښسېزلې، له سرو څنګلو یې څاڅکی- څاڅکی اوبه څڅېدې….

دروازه ټېله شوه، پر ملا کړوپ ځوان راننوت، سترګې یې کش کړې، د شپاله وره ته یې وکتل، ګوډ- ګوډ روان شو، پر تورو څپلیو یې شنه واښه سرېښ وو….

ښځې وټوخل، د ټیکري پیڅکه یې کش کړه، سړي ته یې وکتل:

ـــ زویه رشقه دې راوړه. ښه، پڼډه د شپاله په وره کې وغورځوه، زه یې بیا غوا ته ورکووم.

ـــ سمه ده مورې، الته یې غورځوم.

ځوان خوله وازه کړه، اوږد اسوېلی یې وکيښ، د برنډې خاورینو زینو ته په ډډه شو، د کلا په کونج کې یې ژېړې غوا ته وکتل، شونډې یې پرانیستې:

ـــ مورې نن لکچې اخره ده؟

ـــ هو زویه خدای دې قبوله کا، ښه برکتي میاشت وه…

ـــ مورې د اختر سودا خو مې راوړې، نور خو به څه شی نه وي پکار؛ که څه نه وي چې اوس پسې لاړ شم؟

ـــ نه- نه زویه هر شی ډېر دي؛ خو ګوره تا دې ځانته بوټ واخیستل؟

غوا ړمباړه کړه، زور یې وکړ، په خوشایو ککړ پړی یې وښوراوه….

ځوان سترګې چوغې کړې، پاڅېد، له زینو یې ټوپ کړ او په بیړه د شپاله خواته روان شو….

*****

چرګ وزورونه وټپول، غاړه یې هسکه کړه، د مرغانچې له سوري یې د سهار رڼايي ولیده، اوږد بانګ یې د کلي په لیرې مرغانچو کې د نورو چرګانو تر غوږ شو. د لمر ژیړې وړانګې د لوی دېوال پر مایه‌پوشته ولګېدې….

ځوان پاکې جامې واغوستې، اینې ته ودرېد، له اوږدو وېښتانو یې لنډ- لنډ څاڅکي څڅېدل. ږمنځ یې سر ته کړه؛ خو لایې په شانه کولو شروع نه وه کړې، چې په انګړ کې یې د ماشومانو شور- ماشور واورېد، په بیړه له کوټې ور‌ووت….

ــــ ولې چارمغز نه راکوې، موږ د غنمو نینې نه اخلو!

ــــ هر کور چامغز، منګپېلي، ژوالې او… وېشي، یو تاسې غنم راکوئ!!

ــــ واخله موږ دا نه اخلو، راځئ هلکانو دا غریبان په څه کې دي!!!

ځوان روانو ماشومانو ته کاږه وکتل، ټیټ شو، زړه څپلۍ یې له پښې وویسته، غوښتل یې چې یو پکې په نښه کړي؛ خو د مور په لړزاند غږ یې له ماشومانو سترګې واړولې.

ــــ مه کوه، زویه! خیر دی، الکان دي، نه پوهېږي….

ــــ مورې خو پرون مې درته وویل، چې که څه نه وي، چې را‌یې وړم.

ښځې له ټکري راوتلي سپین وېښتان تر غوږ واړول، د زوی ګونځې تندي ته یې وکتل، غلي یې وویل:

ــــ خیر زویه، دې شیانو ته دې چورت مه خرابوه، خدای به دا هر څه سم کړي، تاته دې خدای دومره همت درکړي، چې یو ځل د دې شېیید (شهید) پلار، کړي پورونه خلاص کړې….

د ځوان زړه ډک شو، څپلۍ یې له لاسه پرېوته، سر یې وځړېد او په لمدو سترګو یې د پخو غنمو ډکې کاسې ته کتل.

348 total views, 2 views today

Leave a Reply

Your email address will not be published. Required fields are marked *

۸

د خپلواکۍ 100 کالیزه Independence

د ژبې، رسنیو او سیاست خپلواکي | عمر بورا زماني

خپلواکي یو لوی نعمت دی چې انسان د خپلی خوښی او فیصلو اختیار په خپله ولري. د خپلواکۍ برعکس غلامي…

د ژبې، رسنیو او سیاست خپلواکي | عمر بورا زماني

02 Sep 2019 خپلواکي مقالې تاند No comments

نور

پر (اماني فکر) څو کرښې| خالد افغان

(اماني فکر) د ښاغلي بخت مرجان بختيار صيب کتاب دی چې په لنډو ورځو کې خپور شوی دی. کتاب د…

پر (اماني فکر) څو کرښې| خالد افغان

24 Aug 2019 uncategorized خپلواکي تاند No comments

نور

د خپلواکۍ سليزه؛ لنډه کتنه

د سیمه ییزو او ستراتیژیکو مطالعاتو مرکز هغه جګړه چې امير حبيب الله خان ونه کړه، محافظه کاري يې وکړه…

د خپلواکۍ سليزه؛ لنډه کتنه

29 Aug 2019 خپلواکي مقالې تاند No comments

نور

 دارالامان ماڼۍ د ولسمشر په لاس او د شهزادګۍ هندیه…

تاند، چهارشنبه، د اسد ۳۰مه: ولسمشر د خپلواکۍ د سلمې کلیزې په ویاړ رغول شوې د دارالامان ماڼۍ په شاندارو…

 دارالامان ماڼۍ د ولسمشر په لاس او د شهزادګۍ هندیه په وینا پرانیستل شوه

21 Aug 2019 خبرونه خپلواکي م. عاصم خوږیاڼی No comments

نور

د خپلواکۍ سلمه کلیزه دې بختوره وي| احسان ارینزی

د نړۍ په ټولو هېوادونو کې داسې عنعنوي، فرهنګي، دیني او ملي ورځې شته چې خلک او حکومتونه یې په…

د خپلواکۍ سلمه کلیزه دې بختوره وي| احسان ارینزی

21 Aug 2019 خپلواکي مقالې تاند No comments

نور

د خپلواکۍ د سلمې کلیزې په ویاړ نن شپه د…

تاند، چهار شنبه، د اسد ۳۰ مه: د کورنیو چارو وزارت اعلان کړه چې نن د اسد په ۳۰مه به…

د خپلواکۍ د سلمې کلیزې په ویاړ نن شپه د کابل پر ۳ غونډیو اورلوبه کېږي

21 Aug 2019 خبرونه خپلواکي م. عاصم خوږیاڼی No comments

نور
  • 1
  • 2