Categories

اعلان

Loading…

سپینه ماڼۍ له حقاني شبکې سره هم د سولې د خبرو ملاتړ کوي

تاندا- د واشنګټن ټایمز ورځپاڼې د راپور له مخې، د سپینې ماڼۍ د ملي امنیت چارواکي د افغانستان د اوولس کلنې جګړې د پای ته رسېدو لپاره د طالبانو ترڅنګ له حقاني شبکې سره د افغانانو په مشرۍ د سولې د خبرو ملاتړ کوي.

ورځپاڼه وايي، که څه هم امریکا د حقاني شبکه تر ټولو خونړۍ او بې رحمه ډله ګڼي خو که کابل وغواړي چې د جګړې د پای ته رسولو لپاره په پاکستان کې د دې ډلې له غړیو سره د پخلاینې هڅه وکړي، امریکا به د افغانستان د جګړې د پای ته رسېدو په خاطر ورسره مخالفت ونه کړي.

امریکا پخوا له حقاني شبکې سره پخلاینه ردوله.

د متحدو ایالتونو د ملي امنیت شورا یوه چارواکي د یکشنبې په ورځ واشنګټن ټایمز ورځپاڼې ته وویل«زموږ افغان متحدان باور لري چې د سولې په یوه اغېزمنه پروسه کې، چې د څو لسیزو جګړې پای ته ورسولی شي، باید د حقاني شبکې په ګډون ټول طالبان شامل وي او د افغانستان جګړه باید د افغانانو په منځ کې حل شي.»

ده، چې د نوم د نه څرګندېدو په شرط خبرې کولې، همداراز وویل«د امریکا متحد ایالتونه به د افغانستان د حکومت او د هغو ټولو خواوو ملاتړ وکړي چې سولې ته چمتو وي.»

تر دې وړاندې د افغانستان د ملي امنیت شورا چارواکو ویلي وو چې افغانستان حاضر دی چې له حقاني شبکې سره هم خبرې وکړي.

د ملي امنیت سلاکار محمد حنیف اتمر د پنجشنبې په ورځ په واشنګټن کې د افغانستان په سفارت کې وویل«موږ د حقاني شبکې د عناصرو په شمول له هر هغه چا سره چې پخلا کېږي، خبرو ته تیار یوو. له هغه چا سره خبرې نه کوو چې سوله نه مني.»

تر دې وړاندې د افغانستان ولسمشر د فبرورۍ په وروستیو کې د کابل د پروسې په دوهم کنفرانس کې ټولو طالبانو ته د سولې او په کابل کې د سیاسي دفتر د پرانیستلو وړاندیز وکړ.

واشنګټن ټایمز ورځپاڼه وايي چې اوس څرګنده نه ده چې ایا د امریکا د ملي امنیت نوی ټاکل شوی سلاکار جان بولټن هم د حقاني په شمول له ټولو طالبانو سره د سولې ملاتړ کوي او که نه.

د امریکا د ملي امنیت چارواکي وايي چې د افغانستان او جنوبي اسیا لپاره د ولسمشر ټرمپ د نوې ستراتیژۍ له اعلان څخه اووه میاشتې وروسته لا هم پاکستان د طالبانو د ملاتړ په برخه کې په خپله پالیسي کې هیڅ راز بدلون نه دی راوستی. حال دا چې د دې ستراتیژۍ پر اساس پر پاکستان د امریکا مرستې وځنډېدې او پر دغه هیواد سیاسي فشارونه زیات شول.

دوی دا هم وویل چې په راتلونکي کې به پر پاکستان نور فشارونه هم راوړل شي.

6 total views, 1 views today

Leave a Reply

Your email address will not be published. Required fields are marked *