Categories

اعلان

Loading…

د پاکستان صدراعظم د ټاپي پروژې په پرانستونکو مراسمو کې د ګډون لپاره ترکمنستان ته روان شو

تاند- د پاکستان صدراعظم شاهد خاقاق عباسي نن د دوه ورځني سفر لپاره ترکمنستان او افغانستان ته روان شو.

ښاغلی عباسي به په ترکمنستان او افغانستان کې د ټاپي پروژې د عملي کار په پرانیستونکې غونډه کې ګډون وکړي.

ټاکل شوې ده چې په دې غونډه کې د افغانستان، ترکمنستان او هند مشران هم برخه واخلي.

که څه هم په ځینو راپورونو کې ویل شوي چې د هند له لوري به د دغه هیواد د بهرنیو چارو د دولت وزیر په هرات کې د ټاپي پروژې په پرانیستونکې غونډه کې ګډون وکړي.

د پاکستان د صدراعظم د دفتر له خبرپاڼې سره سم، له ښاغلي عباسي سره په دې سفر کې د پاکستان د انرژۍ وزیر جام کمال خان هم ملګری دی.

په پام کې ده چې د ټاپي لومړۍ پړاو د ترکمنستان په سرحداباد او دوهم پړاو د افغانستان په هرات کې پرانیستل شي.

پاکستاني رسنۍ وايي چې د دغه هیواد صدراعظم به په هرات کې د افغانستان له ولسمشر محمد اشرف غني سره د دوو هیوادونو پر اړیکو هم خبرې وکړي.

د هرات په غونډه کې به څلور هیوادونه په خپل منځ کې د ۱۸۱۴ کیلومتره اوږد پایپ لاین په تړاو د تجارتي قراردادونو د شکل شرطونه نهايي کړي.

دا نللیکه، چې له ترکمنستان څخه پیلېږي د افغانستان او پاکستان له لارې د هند تر فازیلکه (فاضل که) ښارګوټي پورې رسېږي.

په دې نللیکه کې به د کال ۳۳ ملیارد مترمکعب ګاز لېږدول کېږي چې ۴ به یې هند او همدومره نور پاکستان اخلي. ۵ ملیارد متر مکعبه نور به په افغانستان کې مصرف شي.

۵ ملیارد متر مکعب ګاز د افغانستان ګڼو لوېدیځو او جنوب لوېدیځو ښارونو ته بس دي.

Leave a Reply

Your email address will not be published. Required fields are marked *