Categories

اعلان

Loading…

پاکستان د امریکا د مرستیال ولسمشر د څرګندونو په وړاندې غبرګون وښود

تاند – پاکستان په افغانستان کې د امریکا د مرستیال ولسمشر پر څرګندونو غبرګون وښود، ویې ویل چې امریکايي چارواکي په افغانستان کې یو څه او په پاکستان کې بل څه وايي.

د امریکا مرستیال ولسمشر مایک پینس نن /جمعه/ په کابل کې وویل، پاکستان له اوږدې مودې راهیسې طالبانو او څو نورو تروریستي ډلو ته پناه ورکړې خو نور دا وختونه تېر شوي دي.

د پاکستان د بهرنیو چارو وزارت د ښاغلي پینس د دغو څرګندونو په ځواب کې وویل، پر نورو هیوادونو تور پورې کول او د ماتې پړه پر نورو اچول، ستونزې نه حل کوي.

د پاکستان د باندنیو چارو وزارت وايي، د متحدو ایالتونو د مرستیال ولسمشر څرګندونې د دغه هیواد د نورو چارواکو له خبرو سره، چې له پاکستانیانو سره په کتنو کې یې کوي، توپیر لري.

د پاکستان د باندنیو چارو وزارت همداراز ویلي«متحدان یو بل ته خبرداري نه ورکوي. امریکا باید هغه عواملو ته جزا ورکړي چې په افغانستان کې د مخدرو موادو د دوه برابره کېدو، پراخ فساد او د داعش د نفوذ د پراختیا لپاره یې لاره هواره کړې ده.

د پاکستان د بهرنیو چارو وزارت وايي، باید د سولې د ټینګښت لپاره د خبرواترو میکانیزم ته ځانګړی پام وشي.

د امریکا مرستیال ولسمشر وویل«موږ هیڅکله پر هغو خطرونو سترګې نه پټوو چې تاسو ورسره مخامخ یاست، حتي هغه خطرونه چې د افغانستان د پولو له ورهاخوا سرچینه اخلي. له اوږدې مودې راهیسې پاکستان طالبانو او څو تروریستي ډلو ته پناه ورکړې خو نور هغه وخت پای ته رسېدلی دی.»

د روان دسمبر په څلورمه د امریکا دفاع وزیر د پاکستان د سفر په لړ کې دغه هیواد ته وړاندیز وکړ، د دې لپاره چې طالبان د سولې خبرو ته خاضر شي، پاکستان، افغانستان او امریکا  دې هممهاله او همږغي عملیات د دې ډلې پر ضد وکړي.

خو ظاهراً داسې ښکاري چې پاکستان حاضر نه دی په خپله خاوره کې د افغان طالبانو پر مشرانو او قوماندانانو فشار راوړي.

10 total views, 2 views today

Leave a Reply

Your email address will not be published. Required fields are marked *